^
لاتشرهون على العنوان (باين أنه مالقى عنوان زين ) اجل مصدقين أن شركتنا الموقره بتصير الاولى عالميا ماودي أقول أن حلم أبليس في الجنه الا في النصب والاحتيال طبعا

مقدمه :.

دائما تتوافق الاحداث وتتلاعن الأمم ويختلط الطيب بالحرام دائما في هذا الزمن المخيس أي خبر زييين لازم بعده عشرين خبر مثل التبن وانتم بكرامه ..! دايم الأخبار الزينه تجي بعدها أخبار تقطع القلب ! وبعد كل المصايب والمهازل نحن نؤمن بقضاء الله وقدره ونحمد الله ونشكره ، يلعن امها فاتورتي 1550 ..! والله لو اني اغازل خوية زيزو الصوماليه واغازلها 24 ساعة ..! ماطلع المبلغ تسذا ..! بس وش نقول لابوكم من شركة اتصلات حرااميه

مكان الحدث :-
في سياره بالقرب من بقاله في شرق الرياض .! أنا وواحد من العيال

الزبده :-
في يوم من الأيام وأنا متكي انا وواحد من العيال في ذي الظهرية في عز القوايل في جو الرياض الحلو والممتع صراحتن ( ينفع يصير مسوق سياحي ) ومشتهي ببسي قلنا نوقف عند بقاله
نرتوي (زمزم مهوب ببسي استغفر الله بس ) شوي توني بصكر الباب الا واسمع صوت مسج اسمع جوالي فيه رساله كنت متأكد الا وواثق وأراهن انها رسالة كولمي
خبري بنص أخوياي تسلاب ومطفرين جيت أناظر إلا ومسج يضيق الصدر L من الاتصلات ويقولون عزيزي العميل سدد فاتورة جوالك ولا بنقطع جوالك وبنلعن امك .!
تصكني الغلقه وأشيل هم الفاتوره الله يلعن أمها وأناظر خويي .! إلا وهو مبسووط وساحبن علي ورايق على ذي الظهرية .! قلت سعوووووود، سعوووووود ولعنه ! قال هاه قلت وش بلاك قال ابد موبايلي يقولون انك عميل مميز وعندك نقاط ! وعطوني 100 ريال اكلم بها ! قمت أزاعق و اقوووول صديق ياصديق هات الديزل هات ديييييييزل ياصديييييق هات الديزل هات الولاعه هات المتفجرات .! يلتفت علي خويي !
يقول محمد افا انهبلت وش بلاك أركد ياخوي أركد ! وش فييييك ! وراك انقلبت بتفجر العالم وبتصير إرهابي يا كافي .! قلت بنهبل ! بفجر
شركة اتصالات توسع الصدر وشركه سعوديه ما ورآها إلا الهموم L قال وش فيك !
قلت فاتورتي 1550 ! قال ايييييه هذا حال الشباب السعودي مكافئات مقطوعه وفواتير ! L
يقلت له لا ماينفع بنتحر بنتحر بنتحر قالي تسوي خير في المسلمين ! وماودي أقول بقرييح ! ،.
اتصلت على 902 ابي اشوف السالفه اتصلت عليهم وليتني ما اتصلتوانرقعت نص ساعه ومن اللعانه يرقعوني ويخلون هالجهاز الآلي يهذر علي الين ماتورَم اذني !! حامت تسبدددددي قسمن بالله حفظت كلامهم وربي ! ون زود اللعانه محد رد علي !
قلت مالنا الا نروح ورا ذا الشموس ونشوف سالفتهم ! ،
رحت وياليتني مارحت ! دخلت بعد وشو حول مايخبص الدوام ! ،
دخلت على الموظف وقلت له تسذا وتسذا وتسذا وشرحت له الوضع ، قال سدد بالاول وهمن اعترض عليها !! قلت وشو العب غيرها معصي .! ،

رحت وطلبت منه كشف للمكالمات الصادره وبمافيها الرسايل .! ،
أشوف ياولد ارقام منب اعرفها ! ورسايل كثر قريح مع إني منب أرسل رسايل واجد !
قلا سلامات من وين طلعت ذي قال يا خوي سدد وهمن اعترض , طيب لو ماسددت ولا صلحتوا الغلط وش بيصير ؟! همس لي وقال ياحبيبي مهوب انت الي تنسرق بلحالك حتى حنا الموظفين وقال ماعندي إجراء ثاني أسويه وأخدمك والله ..! قلت ماقصرت يالذيب
ويعطيك ألف عافيه حسبي الله على الحراميه ! ، .

الوضع صاير مهازل ولعب ونهب!
يعني بالعربي الاتصالات صايره زي الإرهابي اللي يقتل المسلمين ويفجر أرواح الأبرياء!!------> لا بعد تشبه يرحم أمك ! )

الاتصالات مابقى إلا يخلون معك واحد من المباحث يمشي معك وكل شهر ينط في وجهك ياخذ الفاتورة من ورا خشمكولو تفكر تناقش وإلا تروح بفاتورتك قالوا لك أنثبر ! وصح ليييين بكره ! ،
ولو تفكر تروح لهم يخلص الدوام وأنت توك ماوصلك الدور ! ويصرفون ويقولون السستم خربان يلعن أم السستم اللي ماقد اشتغل زي الناس ، يا عالموبعدين لو فيهم خير كان طبقوا هالنظام على الكبير والصغير مهوب بس على اللي الضعوف ! ولا الكباريه تجيهم الفواتر لبيوتهم مزخرفه ولا بمبالخ برخص التراب ! كل ذا عشان مايسحبون ! على الشركه ويفقدون اساميهم بالسجلات ! ،.
مرت الأيام ومشينا السالفه .. ! ، وانا أتصفح الجريدة واقلب صفحاتها (مهوب عاقل المثقف ) شفت اعلان انك تشوف ..! التلفزيون بجوالك .! ولا بتسعه ريال فقط ولا من القنوات قنوات مشفره مثل art وطقتها ..! قلت أخس بصيييير كشخه .! وحركات وبهايط .! مرت كشك بسوق وكان الموظف سعودي ،
سلمت وقلت يا بعدي أبي اركب دش بجوالي لاهنت قال بتلقاه في الحمامات اللي عند المسجد خخخخخخخخخخ -----> ملكع ابن الذين!(هذا وانا خبييير دشوش ) ،
الموهم قام يهذر ويهذر وقال ان ذي قنوات تركب على الجوال قلت خل أرسالكم يجي لغرفتي وبعدين قل تلفزيون ، ويعطيني من الرخيييص وأنا مفهي !
وداري انه ينصب بس الشكوى لله ! ركبنا ذي القنوات ويا ليتنا ما ركبناها لعنبوا بليسهم كل دقيقه تقطع منتب تشوف شي تقول تناظر قنوات استغفر الله مهوب قنوات مثل العالم والمسلمين !
وكنت فرحان بعد وأحسب أنها بـ9 ريال مدري بـ10 ريال !
ويكلمني واحد من العيال يقولي ترا مهوب بـ 9 ريال قلت هاه وشو
قال بـ 75 هللة للدقيقه وأدق على الاتصالات الا ويطلع كلامه صدز .! L والمشكلة ماشفت شي خخخخخخخ يا ليتها على شي L على تقطيع .. ! ،.
طرا على بالي أن الشركه سعوديه 100 % قلت وهذي شركه سعوديه بعد وأنواع الزرف والنهب والاستغلال ..! L
بدايه من شريحه أم 10 الاف وأسعارهم المرتفعه ! وخدماتهم الزفت وأنتم بكرامه ..! وخدمة العملاء الي ماتنبغى ولا بريال ..! ،
وأنا الي ملعوبن علي من مبطي وأقول شركه سعوديه ووين الوطنيه يامحمد خخخخخخخ والسعودي أرحم أن يزرفك من غيره ! ،

ثلاثة أرباع خدماتهم ماقد شفناها الا يوم طلعت موبايلي ولا أول نحلم فيها ! كل هذا ليييش لأن الشركة محتكره القطاع وتوهم يخلون الشركات الثانيه يدخلون في نفس القطاع .! بشكل طبيعي
لو أن أي واحد مدير للشركه بيرفع الاسعار ويستغل بس مهوب بشكل بجييييح لذي الدرجه ! أجل أنا الي وقتي كله نت ،نوم ،آكل ، دوام فاتورتي 1550 ..!
ياليت نشوف التوسع ومنع الاحتكار في كذا قطاع ..! آخر مثل الهاتف والـ dsl العالم وصلوا للقمر وحنا تونا على الاتصال الدولي والجيل الثاني عندنا زفت وتقطيع وأنتم بكرامه ..! ،